हामीले नाफालाई भन्दा पनि ग्राहकको सेवालाई जोड दिएका छौं, जेनेक्स ट्रेडर्स

सूचना तथा प्रविधिको नविनतम प्रविधिहरुलाई हामीले इन्फोटेकमा भित्र्याउनेछौं

सोमवार, माघ २२, २०७४
1247

नविन पौडेल
सञ्चालक, जेनेक्स ट्रेडर्स

पोखरामा बिगत ८ वर्षदेखि सूचना तथा प्रविधिसँग सम्बन्धित व्यवसाय सञ्चालन गरिरहेका नविन पौडेल सामाजिक क्षेत्रमा पनि त्यतिकै सक्रिय छन् । जेनक्स ट्रेडर्सका सञ्चालक पौडेल १०३ वर्ष पुरानो अन्तर्राष्ट्रिय सामाजिक संस्था किवानिज क्लबलाई पोखरामा भित्र्याउन समेत सफल रहे । किवानिज क्लब अफ पोखराका संस्थापक अध्यक्ष तथा किवानिज नेपालका बोर्ड डाइरेक्टर नविन पौडेल कम्प्युटर एशोएिसन नेपाल (क्यान) महासंघ कास्की शाखाका प्रथम उपाध्यक्ष पनि हुन् । उनै पौडेलसँग जेनेक्स ट्रेडर्स, किवानिज क्लब, क्यानले आयोजना गरेको इन्फोटेक लगायत विविध विषयमा केन्द्रित रहेर  गरिएको  कुराकानीः

सूचना तथा प्रविधिको व्यवसायमा कहिलेदेखि आबद्ध हुनुभयो ?
सूचना तथा प्रविधिको क्षेत्रमा केही गर्नुपर्छ भन्ने मेरो सोच थियो । आफ्नो रुचीको क्षेत्र भएकाले मैले यस क्षेत्रमा लगानी गरेको हुँ । आजभन्दा करिब ८ वर्ष अगाडिबाट म यो व्यवसायमा आबद्ध छु । पोखराको न्युरोडमा जेनेक्स अटोमेसनबाट सुरु भएको यो व्यवसायलाई समय अनुसार परिमार्जित र लगानी बिस्तार गर्दै अगाडि बढिरहेको छु । अटोमेसन सञ्चालन भएको ४ वर्षपछि न्युरोडकै गिरी कम्प्लेक्समा जेनेक्स ट्रेडर्स सञ्चालनमा ल्याएँ । दुवै ठाउँमा अहिले अत्याधुनिक सेवासुविधा सहित व्यवसाय सञ्चालनमा छ । ग्राहकको निरन्तरको मायाले व्यवसायमा थप प्रोत्साहन मिलेको छ ।

कुन–कुन ब्राण्डलाई बिक्री गर्दै आउनुभएको छ ?
यो व्यवसायसँग सम्बन्धित सबै सामग्री हामीसँग उपलब्ध छन् । विशेष गरी धेरै प्रडक्टको हामी गण्डकी तथा धौलागिरी क्षेत्रको आधिकारिक बिक्रेता भएर काम गरिरहेका छौं । ल्यापटप र डेक्स्टप कम्प्युटरमा डेल, लेनोभो र आसुसको हामी यस क्षेत्रको आधिकारिक बिक्रेता हो । नेटवर्किङ डिभाइसहरुमा टिपी लिङ्क, डिजिकम, युबिएनटी र इडिम्याक्सको आधिकारिक बिक्रेता भएर काम गरिरहेका छौं । प्रिन्टरमा ब्रदर, एन्टिभाइरसमा के सेभेन र क्यास्परस्कीको आधिकारिक बिक्रेता हौं । म्याक्याफी एन्टी भाइरसलाई पनि हामीले पोखरा भित्र्याउने तयारी गरेका छौं । प्रोजेक्टरहरुमा एनइसी र डेलको काम गरिहेका छौं भने एसियन ब्याट्रीको पनि हामी यस क्षेत्रको आधिकारिक बिक्रेता हौं । इन्भर्टरमा जेसिएम र सुक्याम हामीसँग छ । इन्टरकममा एनइसीको बिक्रेता हौं । एएनबी ब्राण्डको सिसी टिभी तथा सेक्युरिटी सिस्टमको पनि हामी बिक्रेता हौं । लगायत सूचना तथा प्रविधि क्षेत्रमा नेपाल भित्रिएका प्राय प्रडक्टहरु बिक्रीका लागि राखिन्छ । म्याक्सेल ब्राण्डका नोटकाउन्टिङ तथा फेक नोट डिटेक्टर मेसिनलाई पनि पोखरा भित्र्याएका छौं । डब्लु डि तथा ट्रान्सेन्ट ब्राण्डका हार्डडिक्सको पनि काम गरिरहेका छौं ।

जेनेक्सबाट सामानहरु कुनकुन क्षेत्रमा पुग्छन् ?
हाम्रो मुख्य बजार पोखरा क्षेत्र नै हो । कास्की बाहेक स्याङ्जा, बागलुङ, बेनीमा पनि राम्रो माग हुन्छ । आसपासका अन्य जिल्लामा पनि आवश्यकता अनुसार सामानहरुको माग हुँदै आइरहेको छ ।

ग्राहकबाट कस्तो प्रतिक्रिया पाउनुभएको छ ?
हाम्रो सेवाबाट ग्राहकहरु सन्तुष्ट छन् । हामीले नाफालाई भन्दा पनि ग्राहकको सेवालाई जोड दिएका छौं । सस्तो मूल्यमा ब्राण्डेड सामान पाउने भएकाले नै ग्राहकको रोजाईमा जेनेक्स परेको हो । बिक्री पछिको सेवा हाम्रो स्तरीय छ । सूचना तथा प्रविधिसँग सम्बन्धित व्यवसायमा हामी पोखराको पहिलो रोजाईको परेका छौं भन्न पाउँदा गौरव हुन्छ । ग्राहकबाट पाएको मायाले नै व्यवसायलाई समय अनुसार परिमार्जित गर्न प्रोत्साहन मिलेको छ । कर्मचारीहरु पनि उत्साही भएर काम गरेको मैले महसुस गरेको छु । जेनेक्स मार्फत २० जनालाई प्रत्यक्ष रोजगारी दिन सफल छौं । आगामी दिनमा लगानी बिस्तार गरी अझै ग्राहकमुखी सेवा प्रदान गर्ने प्रतिबद्धता व्यक्त गर्दछु ।

इन्टरनेटतर्फ के–के सेवा प्रदान गर्दै आउनुभएको छ ?
टेकमाइन्ड्स नेटवर्कमार्फत इन्टरनेटसँग सम्बन्धित सेवा प्रदान गरिरहेका छौं । आइएसपी कम्पनीमार्फत इन्टरनेटसँग सम्बन्धित सेवा हामीले पोखरा क्षेत्रमा प्रदान गरिरहेका छौं । फाइबर तथा वायरलेस सेवा दिइरहेका छौं । छिट्टै आइपी टिभी सेवा दिने तयारी भइरहेको छ । आइपी टिभीमार्फत घरघरमा टिभी च्यालन हेर्न सकिनेछ । इन्टरनेट तथा केबल टिभीमा लाग्ने सम्पूर्ण सामग्रीहरु हामीले होलसेलमा बिक्री गर्दै आइरहेका छौं ।

किवानिज क्लबमा पनि आबद्ध हुनुहुन्छ । यो कस्तो संस्था हो ?
म किवानिज क्लब अफ पोखराको संस्थापक अध्यक्ष भएर काम गरिरहेको छु । किवानिज नेपालको बोर्ड मेम्बर तथा प्रदेश ४ को चियरपर्सन भएर पनि काम गरिरहेको छु । यो आजभन्दा १ सय ३ वर्ष अगाडि स्थापना भएको अन्तर्राष्ट्रिय सामाजिक संस्था हो । विशेष गरी बालबालिकाको क्षेत्रमा यस संस्थाले काम गर्दै आइरहेको छ । यो संस्थालाई हामीले पोखरामा डेढ वर्ष अगाडि भित्र्याएका हौं । हामीले पोखरा तथा आसपासको क्षेत्रमा बालबालिकालाई लक्षित गरी सेवाका गतिविधि सञ्चालन गरिरहेका छौं । पोखरामा अहिले महिलाहरुको क्लब पनि स्थापना भइसकेको छ । विशुद्ध सामाजिक भावनाका साथ हामी क्लबमा लागेका हौं ।

क्यान कास्कीको प्रथम उपाध्यक्ष हुनुहुन्छ । क्यान इन्फोटेक समेत नजिकिएको छ । इन्फोटेकको तयारी कस्तो छ ?
क्यान इन्फोटेक आगामी फागुन ४ देखि ८ गतेसम्म पोखराको नयाँबजारस्थित प्रदर्शनीकेन्द्रमा सञ्चालन हुँदैछ । विशेष गरी सूचना तथा प्रविधिको नविनतम प्रविधिहरुलाई हामीले इन्फोटेकमा भित्र्याउनेछौं । म इन्फोटेकको स्पोन्सर व्यवस्थापन उपसमितिको संयोजक भएर काम गरिहेको छु । डिजिकमको मुख्य प्रायोजन रहेको इन्फोटेकमा इन एशोसिएसन विथमा नेटिसले साथ दिएको छ । पावर्डवाई के सेभेन एन्टिभाइरस तथा म्याकाफी एन्टीभाइरसको साथ छ । सिल्भर स्पोन्सरमा एक्स्पर्ट एजुकेशन एण्ड भिजा सर्भिसेस, प्रिन्टिङ स्पोन्सरमा ब्रोदर प्रिन्टर छ । अन्य स्पोन्सरहरुमा डेल, लेनोभो, इडिम्याक्स, माइक्रोल्याब लगायतका ब्राण्ड आबद्ध भइसकेका छन् भने अन्य ब्राण्ड पनि जोडिने तयारीमा छन् ।


यसमा तपाइको मत