कोरोना भाइरससंग पुरा विश्व जुधिरहेको बेला विभिन्न शैक्षिक संस्थाहरुले अनलाइन कक्षा मार्फत विद्यार्थीलाई अध्यापन गराइरहेका छन् । यस्तैमा अनलाइन कक्षामा अध्ययन गर्दै आएको एक विद्यार्थीको तस्बिर भाइरल बनको छ ।
भारतमा आफ्नो शैक्षिक संस्थाले जारी गरेको अनलाइन कक्षा लिन एक विद्यार्थी दैनिक पहाड चढेर अध्ययन गरिरहेका छन् । भारतको राजस्थानका निवासी हरिश नामक विद्यार्थीले गाउँमा मोवाइल नेटवर्क नभएका कारण पहाडमा चढेर अनलाइन कक्षा लिदै आएका हुन् ।
हरिश अनलाइन कक्षामा सहभागिता जनाउन दैनिक २ किलोमिटरको उचाई चढेर अनलाइन कक्षा लिदै आएका छन् । जिल्लाको सदरमुकामबाट २० किलोमिटर टाढा रहेको उनको गाँउमा मोवाइलको नेटवर्क हुदैन ।
त्यसैले हरिश दैनिक २ किलोमिटर उकालो चढेर बिहान ८ बजेदेखि दिउँसो १ बजेसम्म ४०/४५ डिग्रीको प्रचण्ड गर्मीमा अनलाइन कक्षा लिदै आएका छन् ।
यति धेरै संर्घषका बावजुद पनि हरिशको मनोबल कम भएको छैन । उनी दैनिक सबेरै उठेर पहाडको उकालो चढ्दछन र नेटवर्क आउने स्थानमा पुगेर अनलाइन कक्षामा भाग लिन्छन् ।
हालैमा उनको लगन र मेहनतलाई स्रहाना गर्दै चर्चित क्रिकेटर वीरेन्द्र सहवागले सहयोग गरेका छन् । हरिश स्थानीय बाडमेरको पचपदरामा स्थित जवाहर नवोदय विद्यालयमा कक्षा ७ मा अध्ययनरत छन् ।
