पोखरा, असार ६ गते ।कास्कीमा निषेधाज्ञा केही खुकुलो बनाउदै एक साता थप गरिएको छ । कास्की जिल्लामा यात्रुबाहक साना तथा ठूला सार्वजनीक भाडाका सवारी साधनहरु सञ्चालन गर्न नपाइने भएको छ ।
जिल्ला प्रशासन कार्यालय कास्कीले जारी गरेको विज्ञप्तिमा निजी सवारी साधन(साना सवारी चार पांग्रे र दुई पांग्रे) को हकमा जोर गते जोर नम्वर र विजोर गते विजोर नम्वरका सवारी साधन सञ्चालन गर्न पाइने भएको छ । सवारी साधनले पूर्ण रुपमा स्वास्थ्य मापदण्ड अपनाई अनावश्यक ब्यक्ति नचढाई बढिमा चार पांग्रे सवारीको हकमा चालक सहित ४ जना यात्रु राख्न पाइने छ ।
त्यस्तै सिनेमा हल, पार्टी प्यालेस, होटल, रेष्टुरेन्ट, चिया तथा खाजा पसल, मोटेल, नाँचघर, क्लब डान्सबार, दोहोरी साँझ, फनपार्क, पार्क, रंगशाला फुटसल, खेलकुद स्थल, जिमखाना, फिटनेश सेन्टर, स्पा, स्वीमिंग पुल, ब्युटी पार्लर, शैलुन, फुथपाथ पसलहरु लगायतका सेवा एवं स्थलहरु खोल्न तथा सञ्चालन गर्न नपाइने कास्कीका प्रमुख जिल्ला अधिकारी थानेश्वर गौतमले जानकारी दिनुभयो । माथि उल्लेखित बाहेक खाद्यान्न, फेन्सी, हार्डवयर, तरकारी, फलफुल, दुधका पसलहरु विहान ५ देखि मध्यन्न १२ बजेसम्म सच्चालन गर्न पाइने भएको छ ।
