राजकीय सम्मानका साथ एमाले उपाध्यक्ष नेम्वाङको अन्त्येष्टि, छाेराले दिए दागबत्ती

संविधानसभाका अध्यक्षसमेत रहेका नेम्वाङको हिन्दु र लिम्बू परम्परा अनुसार अन्तिम संस्कार गरिएको हो । नेम्वाङलाई बिहीबार दिउँसो पशुपति आर्यघाटमा छोराहरू मिङसो नेम्वाङ र सुहाङ नेम्वाङले दागबत्ती दिएका थिए ।

त्यसअघि नेम्वाङको पार्थिव शरीरमा प्रधानमन्त्री पुष्पकमल दाहाल प्रचण्डले राष्ट्रिय झण्डा ओढाएर अन्तिम श्रद्धाञ्जली दिएका थिए । यस्तै, एमाले अध्यक्ष केपी शर्मा ओलीले नेम्वाङको पार्थिव शरीरमा पार्टीको झण्डा ओढाएर अन्तिम बिदाइ गरेका थिए ।

नेम्वाङको पार्थिव शरीरलाई अन्तिम श्रद्धाञ्जली दिन कांग्रेस सभापति शेरबहादुर देउवा, जसपा नेपालका अध्यक्ष उपेन्द्र यादव, राष्ट्रिय जनमोर्चाका अध्यक्ष चित्रबहादुर केसीलगायत दलका नेता तथा कार्यकर्ता आर्यघाट पुगेका थिए ।

इलाम क्षेत्र नम्बर २ बाट प्रतिनिधिसभा सदस्यमा निर्वाचित भएका नेम्वाङको मंगलबार बिहान ३ बजे महाराजगञ्जस्थित त्रिवि शिक्षण अस्पतालमा निधन भएको थियो ।

घरमै बेहोस भएका नेम्वाङलाई राति १ बजेर ५० मिनेट जाँदा अस्पताल पुर्‍याइएको थियो । तर, चिकित्सकले बिहान ३ बजे नेम्वाङलाई मृत घोषणा गरेका थिए ।